غزل : بیکسی بن گئی معینِ حیات

غزل

بیکسی   بن    گئی   معینِ   حیات
کیوں  اُٹھائیں  کِسی  کے  احسانات

روح   تن   سے  جُدا   ہوئی   لیکن
زندگی  سے  کہاں  ملی  ہے  نجات

دام     اپنا    سمیٹ    لے     صیاد
پاؤں پکڑے ہوئے ہیں خود  حالات

ہم  کو   راس  آ   گئی   بہارِ   چمن
جیب ودامن سے مِل گئی ہے نجات

ہم    نے    دامن     بچا    لیا    اپنا
آکے  آنکھوں  میں  رُک گئی برسات

زندگی    تاب   و    تپش    کا    دن
موت  تاروں  بھری  حسین  اک رات

پابہ    زنجیر    ہیں    وہی    قیسی
جِن  کو   رہتا   ہے   پاسِ  ممنوعات

قیسی الفاروقی

______________________

Find it on Facebook : www.facebook.com/QaisiAlFaruqui

_____________________________________________

A Ghazal by Qaisi AlFaruqui

غزل : جسے دل سمجھتا ہے بے خبر نہیں کچھ بھی اس میں جو غم نہیں

غزل

جسے دل سمجھتا ہے بے خبر نہیں کچھ بھی اس میں جو غم نہیں
یوں ہی بے حسی میں گزر گئی تو حیات بھی موت سے کم نہیں

میری عمر بھر کی مسرتیں انہیں چار تنکوں پہ تھیں مگر    
جو چمن بچا ہے تو باغباں مجھے آشیاں کا بھی غم نہیں     

میں بغیر منتِ راہبر ہوں بلند و پست سے باخبر           
مرا ذوق خود مرا رہنما، میں اسیر نقش قدم نہیں        

ہیں عبث یہ تیری شکایتیں یہی بیش و کم کی حکایتیں     
تجھے خود ہی پاسِ خودی نہیں ترے دل میں اپنا بھرم نہیں

ہے قسم مذاق سجود کی کہ نگاہِ شوق و شعور میں               
وہ جبیں ہے ننگِ جبیں ابھی جو کسی آستاں پہ خم نہیں    

نہ مسرتوں کا خیال ہے نہ مصیبتوں کا ملال ہے             
تری ہر خوشی ہے مری خوشی یہی اک خوشی مجھے کم نہیں 

وہی تیرا قیسی مبتلا، ترے در پہ تھا جو پڑا ہوا                  
نہ ہوا ہو مشق غریب پر کوئی ایسا طرزِ ستم نہیں     

قَیْسِیْ اَلْفَارُوْقِی

____________________________

A Ghazal by Qaisi Al Faruqui

Find it on Facebook : www.facebook.com/QaisiAlFaruqui

نظم : جھنڈا

جھنڈا

پریم کی آؤ نگری بسائیں
راگ سے اپنے غم کو بھلائیں
پریت کا سب کو گیت سنائیں
آؤ ہم تم مل کر گائیں
ہند کا پیارا پیارا جھنڈا، ہند کا راج دلارا جھنڈا
ساری دنیا میں لہرائیں

آپس کے سب فرق مٹائیں
آزادی کو دھرم بنائیں
آزادی ہی کے گن گائیں
تن من دھن سب کچھ ہی لٹائیں
ہند کا پیارا پیارا جھنڈا، ہند کا راج دلارا جھنڈا
ساری دنیا میں لہرائیں

اونچے اونچے محلوں والے
تاجوں والے تختوں والے
خود غرضی کے سب متوالے
تو بھی گا دھن دولت والے
ہند کا پیارا پیارا جھنڈا، ہند کا راج دلارا جھنڈا
ساری دنیا میں لہرائیں

دولت دیش کی اپنی کر لیں
جھولی مسکینوں کی بھر دیں
دکھیوں کی ہم سیوا کر لیں
سب کو خوش و خرم کر دیں
ہند کا پیارا پیارا جھنڈا، ہند کا راج دلارا جھنڈا
ساری دنیا میں لہرائیں

دکھیا بپا  کا نام مٹا دیں
سکھ کا جگ میں راج چلا دیں
درویش پجاری زور دکھا دیں
آزادی کی دھوم مچا دیں
ہند کا پیارا پیارا جھنڈا، ہند کا راج دلارا جھنڈا
ساری دنیا میں لہرائیں

قیسی الفاروقی

_____________________

A Poem by Qaisi Al Faruqui

Find Qaisi Al Faruqui on Facebook.